असोज १८–२० को भीषण वर्षापछि गएको बाढी र पहिरोले इलाममा जनधनको व्यापक क्षति गरेको थियो । त्यही रात गएको पहिरोले राजदुवाली–इलाम जोड्ने करिब ८ सय मिटर बाटो अहिलेसम्म अवरुद्ध छ । गत शनिबार स्थलगत भ्रमणमा आएका भौतिक पूर्वाधार तथा यातायातमन्त्री कुलमान घिसिङले अवरुद्ध सडक तत्काल खुलाउन निर्देशन दिएका थिए । तर, सडक सञ्चालन हुन सकेन ।

सडक डिभिजन इलामका अनुसार सडक खुलाउन रातदिन कर्मचारी खटिएका छन् । तर, भौगोलिक चुनौतीका कारण बाटो खुलाउन कठिनाइ बढेको इन्जिनियर अर्जुन घिमिरेले बताए । ‘हामी रातदिन काम गरिरहेका छौं,’ घिमिरेले भने, ‘तर तिहारअघि बाटो सञ्चालन गर्ने स्थिति छैन ।’

पहिरोले भीरै भासिएको छ । पहिरोको बाहिरी सतह स्थिर देखिए पनि भित्रैदेखि माटो खस्ने क्रम रोकिएको छैन । ‘यहाँको भूगोल नै अनौठो छ,’ उनले थपे, ‘हेर्दा सामान्य देखिन्छ तर भित्रभित्रै पहिरो जान्छ । सामान्य वर्षा भए पनि भासिने खतरा रहन्छ ।’

स्थानीयहरूका अनुसार सडक अवरुद्ध हुँदा इलामतर्फको सामान ढुवानी प्रभावित भएको छ । आपतकालीन सेवालाई पनि वैकल्पिक बाटो प्रयोग गर्नुपर्ने बाध्यता छ । सडक डिभिजनले भारी उपकरण र प्राविधिक टोली परिचालन गरे पनि स्थायी समाधानका लागि दिगो ढलान स्थिरीकरण र नाला सुधार आवश्यक रहेको विज्ञहरूको सुझाव छ ।

भौगर्भिक रूपमा कमजोर यस खण्डमा करिब ४० मिटर मोटाइको माटो मात्रै रहेको र चट्टान नहुँदा पानी सजिलै सतहभित्र छिरेर भीर खस्ने समस्या बढेको भू–प्राविधिक विज्ञ डा. मधुसूदन आचार्यले बताए । उनका अनुसार तलदेखि माथिसम्म सात–आठ ठाउँमा पानीका नयाँ मुहान निस्किएका छन्, जसको व्यवस्थापन सुरु भइसकेको छ ।