पाँचथर । नेपाल तरुण दल पाँचथरको आयोजनामा शनिबारदेखि सुरु भएको ८औं तरुण गोल्डकप फुटबल प्रतियोगिताको उद्घाटन खेलमा कुम्मायक गाउँपालिकाले नाटकीय जित निकाल्दै सेमिफाइनलमा प्रवेश गरेको छ । फिदिम माध्यमिक विद्यालयको खेलमैदानमा भएको उद्घाटन खेलमा कुम्मायक गाउँपालिकाले फालेलुङ गाउँपालिकामाथि रोमाञ्चक पुनरागमन जित दर्ता गरेको हो । पहिलो हाफमै २–० ले पछि परेको कुम्मायकले अन्तिम तीन मिनेटमा लगातार दुई गोल गर्दै खेललाई बराबरीमा ल्याएको थियो ।
फालेलुङका लागि सुशन केरुङ र मदन जबेगुले पहिलो हाफमा एक–एक गोल गरेका थिए भने कुम्मायकका लागि दिल सम्हाम्फे र सुशिल लावतीले दोस्रो हाफमा गोल फर्काएका थिए ।निर्धारित समयमा २–२ को बराबरी भएपछि खेल टाइब्रेकरमा पुगेको थियो । टाइब्रेकरमा पनि बराबरी भएपछि अन्ततः खेलको नतिजा सडन डेथबाट निकालिएको हो, जहाँ कुम्मायक विजयी बन्न सफल भयो ।
यता, याङवरक गाउँपालिका खेलमा उपस्थित नभएपछि फाल्गुनन्द गाउँपालिकाले वाकओभर पाउँदै सेमिफाइनलमा स्थान बनाएको छ ।भोलिको पहिलो खेल दिउँसो १२ बजे हिलिहाङ गाउँपालिका र तुम्बेवा गाउँपालिकाबीच हुनेछ भने दोस्रो खेल दिउँसो २ बजे फिदिम नगरपालिका र मिक्लाजुङ गाउँपालिकाबीच हुने कार्यक्रम तय गरिएको छ ।
आयोजक नेपाल तरुण दल, जिल्ला कार्य समिति पाँचथरले ७३औं स्थापना दिवसको अवसरमा आयोजना गरेको प्रतियोगिताको विजेताले १ लाख १ सय ७३ रुपैयाँ र उपविजेताले ५० हजार १ सय ७३ रुपैयाँ पुरस्कार प्राप्त गर्नेछन् ।
