पाँचथर २१ कार्तिक । रानिटार ग्रीन भ्याली युनाईटेड क्लब द्वारा आयोजित दिपावली गोल्डकपको उपाधी तमाखे फुटबल क्लव टिएफसि ले जितेको छ । बलियो प्रतिस्पर्धी राष्ट्रिय युवा संघ पाँचथरलाई १ शुन्य गोल अन्तरले पराजित गर्दै तमाखेले उपाधी उचालेको हो ।
आईतबार भएको सेमिफाईनलमा न्यु पाथिभरा स्पोर्टिङ क्लबलाई ३- २ गोल अन्तरले पराजित गर्दै फाईनल भिडन्त पक्का गरेको तमाखे एफ सि ले खेलको पहिलो हाफमा एक शुन्यको अग्रता लिएको थियो ।
यता रानिटार युनाईटेडलाई पेनाल्टी सुटआउटमा एक शून्य गोलले स्तब्ध पार्दै फाईनलमा तमाखे बिरुद्ध मैदान उत्रीएको युवा संघले खेलको पूरा अवधिभर रणनितिक खेल प्रस्तुत गरे पनि कुनै गोल गर्न नसक्दा उपबिजेतामा चित्त बुझाएको छ ।
तमाखेका लागि पहिलो हाफको मध्य समयमा पाएको फ्री किकलाई सदुपयोग गर्दै जर्सी नं ३ का अर्जुन गुरुङले गोल गरेका थिए । फाईनल खेलमा तमाखेले गरेको एक मात्रै गोल निर्णायक भएको थियो ।
उपाधी सँगै तमाखे एफ सिले नगद ५० हजार सहित ट्रफी मेडल तथा प्रमाणपत्र प्राप्त गरेको छ भने उपबिजेता राष्ट्रिय युवा संघले पच्चिस हजार रुपैया सहित ट्रफी मेडल तथा प्रमाणपत्र हात पारेको छ ।
रानिटार ग्रीन भ्याली युनाईटेड क्लब तथा त्रीवेणी युवा क्लवको संयुक्त आयोजनामा कार्तिक १६ गते शुरु भएको प्रतियोगितामा २० टिमको सहभागिता रहेको थियो ।
