पाँचथर । पाँचथरको डिभिजन वन कार्यालय अगाडि पार्किङमा राखिएको रातो कालो पल्सर मोटरसाइकल साउन १६ गते हराएको खबरले प्रहरी र स्थानीयलाई सतर्क बनायो। डिभिजन वन कार्यालय अगाडिको बाटोमा मोटरसाइकल हराएपछि फिदिम बजारमा समेत ठूलो हल्ला फैलियो। तर सुरक्षा क्यामेरामा कैद भएको एउटा फोटोले घटनाको रहस्य खोल्न मद्दत गर्यो।
फोटोमा देखिएका करण मगर र सन्दिप लावतीलाई मादक पदार्थ सेवन गरी मोटरसाइकलमा सवार देखिएको छ। अनुसन्धानका क्रममा प्रहरीले पत्ता लगायो कि उनीहरूले मोटरसाइकल लिएर तमोर करिडोरको बाटो यात्रा गरेका थिए। नावा खोलामा बाटो सोधेको उनीहरूले प्रहरीलाई बताएका थिए।
धनकुटाको फलामेटार नजिक पुग्दा मोटरसाइकल बिग्रियो र बाटोमै छोडेर उनीहरू पैदल दमक, इलाम हुँदै फिदिम फर्केका थिए। प्रहरीको अनुसन्धान अनुसार उनीहरूले हेन्डल लक नहुँदा मोटरसाइकल लिएर हिँडेको देखिन्छ।
मोटरसाइकल छाडेपछि दुई–चार दिन बित्दा पनि उनीहरू फेरी मोटरसाइकल लिन फर्केका थिएनन्। फलामेटारमा बेवारिसे अवस्थामा मोटरसाइकल रहेको स्थानीयहरूले प्रहरीलाई खबर गरे पनि प्रहरी पुग्दा मोटरसाइकल फेला परेको थिएन, जसले प्रहरीलाई तनावमा पारेको थियो।
तर थप अनुसन्धानपछि चोरी भएको मोटरसाइकल धनकुटा जिल्ला चौबिसे गाउँपालिका ४ बस्ने ३६ वर्षीय कुमार तामाङले नियतनै राखेर आफ्नो मामाको घर, तेह्रथुम जिल्लाको छथर गाउँपालिकामा लुकाएर राखेको देखियो।
यस घटनालाई लिएर सामाजिक सञ्जालमा अनावश्यक चर्चा चलेको थियो जसले अनुसन्धानमा केही प्रभाव पारेको प्रहरीले बताएको छ। तर प्रहरीले आफ्ना स्रोत र छानबिन प्रक्रियामा विश्वास राख्दै सफलता हासिल गरेको जनाएको छ।
प्रहरीले मोटरसाइकल बरामद गरी तीनै जनालाई नियन्त्रणमा लिएको छ र थप अनुसन्धान जारी छ।
