पाँचथर– अथाह पर्यटकीय सम्भावना भएकाले पर्यटन प्रवर्धन र पूर्वाधार विकासमा जोड दिनु पर्ने सरोकारवालाहरूले जोड दिएका छन् । पाँचथर सदरमुकाम फिदिममा पर्यटन कार्यालय काकरभिट्टा झापाले आयोजना गरेको अन्तर्क्रिया कार्यक्रमका सहभागीले यस्तो बताएका हुन् ।
कोशी भ्रमण वर्ष, स्थानीय पर्यटन प्रवर्धन, स्थानीय तहको भूमिका र अवसरका बारेमा छलफल गरिएको थियो । पर्यटन कार्यालयका प्रमुख छविलाल खतिवडाले कार्यालयले गर्ने काम र अगाडी रणनीतिका विषयमा जानकारी गराएका थिए ।
स्थानीय सरकारका प्रमुख तथा प्रतिनिधि, उद्योगी, व्यवसायी तथा पर्यटन व्यवसायीको सहभागिता थियो ।
कोशी प्रदेशको पर्यटन विकासका लागि विभिन्न योजना अघि सारिएको कोशी भ्रमण वर्ष निर्देशक समितिका सह–संयोजक कृष्ण साहाले बताए ।
कार्यक्रममा स्थानीय तहका प्रमुखहरूले पनि धारणा राखेका थिए । फाल्गुनन्द गाउँपालिकाका अध्यक्ष वृजहाङ आङदेम्बेले प्रदेश सरकारले पर्यटन पूर्वाधार बनाउने काममा ध्यान दिनु पर्ने बताएका थिए ।
कार्यक्रम जिल्ला समन्वय समितिका प्रमुख रामराज आङदेम्बेको प्रमुख आतिथ्ययतामा सम्पन्न भएको थियो ।
पर्यटन कार्यालयले झापा, इलाम, पाँचथर र ताप्लेजुङमा पर्यटन क्षेत्रको विकासका लागि काम गरिरहेको छ ।
