पाँचथर । सदरमुकाम फिदिमबाट संकलन हुने फोहोरबाट प्राङगारिक एवं जैविक मल उत्पादन गर्ने बाटो खुलेको छ । फिदिम नगरपालिकाले फोहोरबाट प्राङगारिक एवं जैविक मल उत्पादन गर्ने कारखाना (प्लान्ट) निर्माणका हिमालय एग्रोएकोलोजी रिसर्च एन्ड डेभलपमेन्ट, ईलाम बीच सम्झौता गरे पछि जैविक मल उत्पादन गर्ने बाटो खुलेको हो ।
फिदिम नगरपालिका र हिमालय एग्रोएकोलोजी रिसर्च एन्ड डेभलपमेन्ट बिच २ वर्षको संझौता भएको छ । संझौता अनुसार फिदिम ०४ मा रहेको नगरको डम्पिङ क्षेत्रमा प्लान्ट स्थापनाको लागि नगरपालिकाले निर्माण कम्पनि एग्रोएकोलोजीलाई नगद ६ लाख १८ हजार, ५ रोपनी जग्गा, नगरको डम्पिङ क्षेत्रमा रहेको भवन र आवस्यक सामग्री उपलव्ध गराउने छ ।
सम्झौतामा जैविक मल उत्पादनका लागि आवश्यक जनशक्तिलाई तालिम, कर्मचारी व्यवस्थापनका कार्यहरु एग्रोएकोलोजीको दायित्व अन्तर्गत राखिएको छ । उत्पादित मलको बजारिकरण र व्रान्डिङ गर्ने दायित्व पनि एग्रोइकोलोजीलकै हुने संझौतामा उल्लेख छ ।
२ वर्षको अवधि राखि भएको संझौतामा निर्माण कम्पनी एग्रोएकोलोजीले घरबाट निस्किने फोहोरबाट मल उत्पादन गरी बिक्री गर्नेछ । मल बिक्री बाट प्राप्त आम्दानी नगरलाई संझौता अनुसार उपलब्ध गराउने उल्लेख छ ।
सम्झौता बुधबार फिदिम नगरपालिकाका निमित्त प्रमुख प्रशासकीय अधिकृत निर्मला दाहाल र एग्रोइकोलोजीका अध्यक्ष माधवी मगरले हस्ताक्षर गरेका छन । एग्रोइकोलोजीले इलामको फिक्कलमा मुख्य कार्यालय स्थापना गरी विगत १४ वर्षदेखि जैविक मल उत्पादन गर्दै आएको छ ।
