पाँचथर । नेपाल कम्युनिस्ट पार्टी (एमाले)ले पाँचथरबाट हुने प्रतिनिधि सभा सदस्य निर्वाचनका लागि केन्द्रीय सदस्य तथा पूर्व संविधानसभा सदस्य अइन्द्रसुन्दर नेम्वाङलाई उम्मेदवार बनाएको छ । पार्टीको केन्द्रीय निर्णयअनुसार नेम्वाङलाई आगामी निर्वाचनमा अघि सारिएको हो ।
प्रतिनिधि सभाको निर्वाचन फागुन २१ गते हुँदैछ । निर्वाचन आयोगको कार्यतालिका अनुसार माघ ६ गते मनोनयन दर्ता हुनेछ । पाँचथर जिल्ला एक मात्र प्रतिनिधि सभा निर्वाचन क्षेत्र हो ।
नेम्वाङ एमालेको संगठन निर्माणमा लामो समयदेखि सक्रिय रहँदै आएका अनुभवी नेता हुन् । उनले विद्यार्थी राजनीतिदेखि नै पार्टी संगठन विस्तार र सुदृढीकरणमा महत्वपूर्ण भूमिका निर्वाह गर्दै आएका छन् । पाँचथर एमालेको परम्परागत रूपमा बलियो आधार क्षेत्र मानिन्छ । यसअघि सम्पन्न प्रतिनिधि सभा निर्वाचनमा पाँचथरबाट एमालेका उम्मेदवार बसन्तकुमार नेम्बाङ झिनो मतान्तरले विजयी भएका थिए ।
नेम्वाङको उम्मेदवारीसँगै पाँचथरमा एमाले संगठन थप सक्रिय बनेको छ । घरदैलो अभियान, जनसंवाद तथा संगठन सुदृढीकरणमार्फत मतदातासँग प्रत्यक्ष सम्पर्क बढाउने तयारीमा पार्टी जुटेको छ ।
