पाँचथर । पाँचथर जिल्लाका दुई फरक स्थानमा बुधबार फेला परेका शवको सनाखत गरिएको छ। मिक्लाजुङ गाउँपालिका–५ र फाल्गुनन्द गाउँपालिका–७ को सुलुम्फिमा एक/एक जना मृत अवस्थामा फेला परेका थिए।
पहिलो शव: यासोकका किरण त्रिखत्री
फाल्गुनन्द गाउँपालिका–७ स्थित सुलुम्फिको देउराली भिरको झाडीमा सोमबार दिउँसो करिब ३५ मिटर तल एक पुरुषको शव फेला परेको थियो। उक्त शव कुम्मायक गाउँपालिका–१ यासोक बजार निवासी ३५ वर्षीय किरण त्रिखत्रीको भएको इलाका प्रहरी कार्यालय यासोकले पुष्टि गरेको छ।
मृतकको झोलाबाट फेला परेका नागरिकता र अन्य कागजातका आधारमा सनाखत गरिएको प्रहरीले जनाएको छ। त्रिखत्री करिब १५ दिनदेखि परिवारसँग सम्पर्कविहीन थिए। उनको शव सडकबाट झन्डै १०० मिटर तल झाडीमा भेटिएको हो। इलाका प्रहरी र स्थानीयवासीको सहयोगमा शव निकालिएको थियो। शव पोस्टमार्टमका लागि फिदिम पठाइएको छ।
दोस्रो शव: माङसेबुङकी निर्मला राई
त्यसैदिन मिक्लाजुङ गाउँपालिका–५ मा महिला जस्तो देखिने व्यक्तिको शव फेला परेको थियो। शव केही दिनअघिको जस्तो देखिएको थियो तर पहिचान हुन सकेको थिएन। शुक्रबार (असार २७ गते) जिल्ला प्रहरी कार्यालयले दिएको जानकारी अनुसार, उक्त शव माङसेबुङ गाउँपालिका–२ निवासी धनबहादुर राईकी ४५ वर्षीया श्रीमती निर्मला राईको भएको पुष्टि भएको छ। मृतकको दाजु चन्द्रप्रसाद राईले पाँचथरको आधारभूत अस्पताल रविमा उपस्थित भई शवको सनाखत गरेका हुन्।
दुवै घटनाबारे प्रहरीले अनुसन्धान सुरु गरिसकेको छ। विस्तृत छानबिन भइरहेको जिल्ला प्रहरी कार्यालय पाँचथरका सूचना अधिकारी रुपेश तामाङले जानकारी दिए।
