ताप्लेजुङ । ताप्लेजुङ जिल्लामा रहेका धार्मिक तथा पर्यटकीय स्थलहरुलाई प्रचारप्रसार गरि विभिन्न खाले पर्यटक भित्र्याउने उदेश्यले ताप्लेजुङमा जेठ ३ गते आजदेखि जेठ ७ गतेसम्म ‘ताप्लेजुङ पर्यटन महोत्सव’ आयोजना गरिएको छ ।
जिल्लाबासिले स्वतस्फुर्त रुपमा बजार सजिसजाउसमेत गरेका छन् । तर, बजार भने सुनसान छ । पाथीभरा केबलकार निर्माणविरुद्ध संघर्र्ष गर्दै आएको समूहले आह्वान गरेको बन्दका कारण ताप्लेजुङको यातायात ठप्प भएको छ । संघर्षरत रहेको समूहले बुधबार र बिहीबार दुई दिने यातायात बन्दको आह्वान गरपछि बजार सुनसान बनेको हो ।
यातायात पूर्णरुपमा बन्द भएका कारण कतैबाट मानिसहरुको आवतजावत छैन। मेची राजमार्ग, तमोर कोरिडोर र ताप्लेजुङमा यातायात ठप्प भएकाले जिल्लाको विभिन्न गाउँहरुबाट आउने स्थानीयबासीहरु आउन आउन सकेका छैनन् । महोत्वसमा आउन ९ स्थानीय तहका ६१ वडाबाट आउने स्थानीय रोकिएका छन् ।
‘एक समुहले आह्वान गरेको दुई दिने बन्दका कारण बुधवार बिहानदेखि बेलुकासम्मनै यातायात सेवा ठप्प भयो । आज बिहीबार पनि बिहानैदेखि यातायात बन्द छ। महोत्वको उद्घाटन गर्न प्रधानमन्त्री पुष्पकमल दाहाल प्रचण्ड आउने भनिएपनि उहाँ नआउने पक्का भएको छ’, ‘बन्दले गर्दा बर्बाद बनायो’ महोत्सव मुलआयोजक समितिका सदस्य सचिव देवराज गुरुङले भने ।
महोत्सव मूल आयोजक समितिका संयोजक तथा जिल्ला समन्वय समिति प्रमुख छिरिङ लामाले स्थानीय सर्वसाधारण स्वतस्फूर्त रुपले महोत्सवका विभिन्न कार्यक्रममा सक्रिय रुपले सहभागी बनेपनि बन्द कर्ताले बन्द गरेपछि महोत्सव प्रभावित भएको बताए । पाँच दिन सम्म चल्ने महोत्वमा विभिन्न दर्जनौ कार्यक्रम तय भएका छन् ।
