पाँचथर । पाँचथर शुक्रवार दिन ढल्किदै गर्दा चिसो बढ्दै थियो । हिँउ पर्ने अनुमान चलिरहदा नेपाल पत्रकार महासंघ पाँचथर शाखाको कार्यालयमा रहेको सभाहलमा माहोल तातिदै थियो । यो माहोल गजलले ताताएको हो । शब्द श्रृङ्खलाको ११ औँ अकंमा नयाँ पुस्ताका गजलकारले अवसर पाएका थिए ।
यो श्रृङ्खला गजल मञ्च पाँचथरले सञ्चालन गर्छ । लामो समयपछि चलेको यो श्रृङ्खलामा नयाँ पुस्ताका गजलकारले सुन्दर प्रस्तुती राख्न सफल भएका थिए । पाँचथरका कवि, सहित्यकार तथा सञ्चारकर्मीको उपस्थीतिमा भएको कार्यक्रममा युवा गजलकारले मनोरञ्जन प्रदान गरे । अधिकतर गजलहरु शृगारीक थिए । उक्त कार्यक्रममा आदर्श राम, कुसुम आचार्य, जीवन गौतम, तुफान अधिकारी, नितिज आङबो, निराजन निरौला, पवन अधिकारी, विमला पुरी र मनकुमार तुम्रोकले गजल सुनाएका थिए । गजलकारको प्रस्तुतीमाथि मधुराज केरुङ र राज दिलाञ्जलीले समिक्षात्मक टिप्पणी राखेका थिए ।
