पाँचथर । पाँचथर जिल्ला प्रशासन कार्यालयले फिदिम नगरपालिकाको तोकिएको क्षेत्रमा बुधबार दिउँसो ३ बजेदेखि बिहीबार बिहान ६ बजेसम्म कर्फ्यु जारी गरेको छ।
स्थानीय प्रशासन ऐन, २०२८ को दफा ६ (क) बमोजिम जारी आदेशअनुसार फिदिम नगरपालिका–१, २, ४ र ५ को सीमाभित्र सभा, जुलुस, प्रदर्शन, भेला, हिँडुल, हुलदङ्गा तथा आवागमन गर्न प्रतिबन्ध लगाइएको छ।
फिदिम बजार क्षेत्रको पूर्वमा फेमेखाेला, पश्चिममा जोरसालबजार, उत्तरमा गडीडाँडा र दक्षिणमा हाेक्मा खोला सम्म कर्फ्यु लागू हुने जनाइएको छ।
जिल्ला प्रशासन कार्यालयले कर्फ्यु तोडफोड वा उल्लंघन गर्ने कार्य कानुन विपरीत हुने चेतावनी दिँदै सबैलाई सचेत रहन अनुरोध गरेको छ।
सुरक्षाकर्मी, स्वास्थ्य सेवामा खटिएका सवारी साधन, एम्बुलेन्स, दमकल, शववाहन, सञ्चारकर्मी, पत्रकार, पर्यटक सेवा, मानव अधिकारकर्मी तथा कूटनीतिक नियोगका सवारी साधनलाई भने आवागमनमा छुट दिइनेछ।
प्रमुख जिल्ला अधिकारी अरुण पोखरेलद्वारा हस्ताक्षरित आदेशमा शान्ति सुरक्षा कायम गर्न र सम्भावित अस्वस्थ घटना रोकथाम गर्ने उद्देश्यले कर्फ्यु जारी गरिएको उल्लेख छ।
