पाँचथर । पाँचथरमा पारिवारिक झगडाले ज्यान लिने रूप लिएको छ। फालेलुङ गाउँपालिका–७ आहाले घर भई हाल ससुरालीमा आएका २७ वर्षीय महेन्द्र तामाङले आफ्नै श्रीमती २२ वर्षीया अनु राईको हत्या गरेका छन्।
घटना फिदिम नगरपालिका–१ स्थित नाम्दुमा बिहिबार राति करिब १० बजे भएको हो। घरायसी विवादकै क्रममा तामाङले कोदालोको पासो प्रहार गरी श्रीमतीको टाउकोमा चोट पुर्याएका थिए। गम्भीर घाइते भएकी राईलाई तत्काल जिल्ला अस्पताल पाँचथरमा प्रारम्भिक उपचारपछि झापाको बीएण्डसी अस्पताल बिर्तामोडमा लगिएको थियो। उपचारका क्रममा आज बिहान ४:२० बजे चिकित्सकले उनलाई मृत घोषणा गरेका हुन्।
घटनापछि फरार रहेका तामाङलाई प्रहरीले फिदिम नगरपालिका–६ गाेलेगाउँबाट पक्राउ गरेको छ। जिल्ला प्रहरी कार्यालय पाँचथरका डिएसपी कौशल कुमार बुढाथोकीका अनुसार वैदेशिक रोजगारीका लागि हिँडेका तामाङ प्रयास असफल भएपछि केही दिनअघि मात्रै ससुराली फर्किएका थिए। फर्किएलगत्तै श्रीमतीसँगको विवाद उत्कर्षमा पुगेपछि उनले हत्या गरेका हुन सक्ने अनुमान प्रहरीले गरेकाे छ ।
प्रहरीले घटनाबारे थप अनुसन्धान जारी राखेको जनाएको छ।
