१२ साउन,पाँचथर ।
आगामी १७ कात्तिकमा हुने प्रतिनिधिसभा उपचुनावलाई लिएर नेपाली कांग्रेसमा अन्ततः सक्रियता देखिन थालेको छ । यद्यपि, रूपन्देही–३ मा उम्मेदवार को हुने भन्ने विषयमा पार्टीभित्र अझै स्पष्टता आएको छैन ।
यस क्षेत्रमा कांग्रेसका पूर्वगृहमन्त्री बालकृष्ण खाँणको नाम स्वतः चर्चामा आउँछ । तर, उनले हालसम्म आफू उम्मेदवार हुने भन्ने कुनै आधिकारिक धारणा सार्वजनिक गरेका छैनन् । १८ साउनमा खाँणको अदालतमा अन्तिम सुनुवाइ तोकिएको छ, र उनी अदालती फैसलाको पर्खाइमा छन् ।
कांग्रेस सभापति शेरबहादुर देउवाले गएको शुक्रबार बुढानीलकण्ठमा शीर्ष नेताहरूलाई बोलाएर उपचुनावबारे छलफल थालेका छन् । छलफलमा महामन्त्री विश्वप्रकाश शर्मा, लुम्बिनी प्रदेश सभापति अमरसिंह पुन र अघिल्लो चुनावमा पराजित खाँणले क्षेत्रको वस्तुस्थिति प्रस्तुत गरेका थिए ।
शर्माले चार दिनसम्म स्थानीय नेताहरू सँग संवाद गरेर फर्किएका थिए भने पुन र खाँणले क्षेत्रीय अनुभवका आधारमा पार्टी नेतृत्वलाई जानकारी दिएका थिए ।
एक कांग्रेस नेताले भने, “बालकृष्ण दाइले आकांक्षा देखाउनुभयो भने अरूले दाबी गर्ने ठाउँ नै हुँदैन ।”
तर, स्थानीय नेताहरूले अहिलेको परिस्थितिमा उम्मेदवारबारे खुला बहस आवश्यक रहेको बताउँदै आएका छन् ।
पूर्वसांसद रामकृष्ण ढकाल, जो अघिल्लो चुनावमा रूपन्देही–३ ‘ख’ बाट पराजित भएका थिए, खाँण नउठ्ने भए आफू उम्मेदवार बन्न इच्छुक रहेको बताउँछन् । “उहाँ उठ्नुभयो भने जिताउन लाग्छौं,” ढकालको भनाइ छ ।
त्यस्तै, खाँण निकट लुम्बिनीकी पूर्वप्रदेश सांसद पुष्पा थरुनीले खाँणले उम्मेदवारीबारे कुनै कुरा नगरेको बताउँदै, “हाम्रो चाहना उहाँ उम्मेदवार हुनुहोस भन्ने हो,” भनिन् ।
यसैबीच, क्षेत्रीय नेताहरूले भने कांग्रेसले चुनावी गतिविधि ढिलो सुरू गरेको र अन्य दल –जस्तै रास्वपा र जनमत पार्टी–ले प्रचारकार्य अघि बढाइसकेको उल्लेख गरेका छन् ।
पार्टीको महत्त्वपूर्ण बैठकमा सहभागी रमेश खनालले भने, “महामन्त्री शर्मा सकारात्मक उर्जा लिएर फर्किनुभएको छ । पार्टीले जित्न सक्ने रणनीतिमा लाग्नुपर्ने अवस्था आएको छ ।”
गत प्रतिनिधिसभा चुनावमा कांग्रेसका उम्मेदवार खाँण राप्रपाका दीपक बोहरासँग २६८१ मतान्तरले पराजित भएका थिए ।
बोहराले ३६,७१७ र खाँणले ३४,०३६ मत ल्याएका थिए । तर, कांग्रेसले त्यस क्षेत्रमा स्थानीय तहमा पहिलो दलको हैसियत पाएको थियो – कांग्रेसले २०,२७९, एमालेले १६,९८६, र रास्वपाले १४,१५४ मत ल्याएका थिए ।
अब भने कांग्रेसले उम्मेदवार छनोट गर्दा पार्टीभित्रको गुटगत अवस्था, खाँणको अदालती फैसला र स्थानीय जनमतलाई ध्यानमा राखेर रणनीति बनाउनु पर्ने देखिन्छ ।
