पाँचथर ।चार दिनअघि बाढीले बगाएको हेवा खोलाको डाइभर्सन पुनः निर्माण गरी सडक सुचारु गरिएको छ। पानीको सतह घटेसँगै बिहीबार साँझ ६:३० बजेपछि अस्थायी डाइभर्सनमार्फत सवारी साधन सञ्चालन थालिएको सडक डिभिजन कार्यालय इलामले जनाएको छ।
मेची राजमार्ग अन्तर्गत फिदिम–ताप्लेजुङ खण्डको हेवा खोलामा बनेको डाइभर्सन साउन ४ गतेको अविरल वर्षासँगैको बाढीले बगाएको थियो। त्यसयता ताप्लेजुङ र पाँचथरबीचको सिधा सडक यातायात पूर्णरूपमा बन्द थियो।
पानीको बहाव घटेपछि सडक डिभिजनको टोलीले डाइभर्सन पुनः निर्माण गरेको हो। पुनःनिर्माणपछि अहिले साना तथा ठूला सवारी साधन आवतजावत गर्न सक्ने अवस्था बनेको छ।
सडक डिभिजनले सवारी चालक र यात्रुहरूलाई खोलामा सम्भावित जोखिमलाई ध्यानमा राखी सतर्कताका साथ यात्रा गर्न आग्रह गरेको छ।
