पाँचथर । असार ५ देखि ७ गतेसम्म सम्म सञ्चालन भएको प्रथम सुम्हात्लुङ कप ब्याडमिन्ट प्रतियोगिताको हिसाब सार्वजनिक गरिएको हो । शनिबार पाँचथर ब्याडमिन्टन संघले पत्रकार सम्मेलन मार्फत प्रतियोगिताको आयब्याय सार्वननिक गरेको हो । प्रथम सुम्हात्लुङ ब्याडमिन्टन प्रतियोगिता–२०८१ ले खेलकुद क्षेत्रमा मात्र नभई व्यवस्थापन, पारदर्शिता र उत्तरदायित्वको उत्कृष्ट अभ्यास प्रस्तुत गरेको छ । प्रतियोगिता सम्पन्न भएसँगै संघले विस्तृत आय–व्यय विवरण सार्वजनिक गर्दै करिब पाँच लाख रुपैयाँ नाफा भएको जानकारी दिएको छ ।
संघले शनिबार फिदिममा पत्रकार सम्मेलन गर्दै प्रतियोगिताको वित्तीय प्रतिवेदन सार्वजनिक गरेको हो। संघका कोषाध्यक्ष बेनु तिम्सिनाले प्रस्तुत गरेको विवरणअनुसार, प्रतियोगिताबाट ४ लाख ९५ हजार ८ सय १५ रुपैयाँ नाफा भएको हो। जसमध्ये १ लाख १८ हजार ६ सय रुपैयाँ अझै उठ्न बाँकी रहेको जनाइएको छ।
१६ लाख ७९ हजार आम्दानी, ११ लाख ८६ हजार खर्च
प्रतियोगिता सञ्चालनका लागि कुल १६ लाख ७९ हजार २ सय ६७ रुपैयाँ आम्दानी भएको संघले जनाएको छ। सो रकममध्ये ३ लाख रुपैयाँ सरकारी सहयोग, १२ लाख ७७ हजार २ सय ६७ रुपैयाँ निजी तथा संस्थागत सहयोग, र १ लाख २ हजार रुपैयाँ प्रवेश शुल्कबाट संकलन गरिएको हो।
संघले सार्वजनिक गरेको विवरणअनुसार प्रतियोगिता सञ्चालनमा ११ लाख ८६ हजार ४ सय ५२ रुपैयाँ खर्च भएको हो। खर्च शीर्षकहरूमा खेल सामग्री, पुरस्कार वितरण, खाना, साउण्ड सिस्टम, लाइट, मञ्च सजावट, यातायात, आवास र प्रचारप्रसार लगायतका आवश्यक पक्षहरू समेटिएका छन्। संघका अध्यक्ष तेजबहादुर तुम्बापोका अनुसार प्रतियोगिता अत्यन्त सफल हुनुमा स्थानीयको उत्साहजनक सहभागिता र निजी क्षेत्रबाट प्राप्त उल्लेखनीय सहयोग मुख्य कारण रह्यो। “हामीले सोचेजस्तै मात्र होइन, सोचेजभन्दा बढी साथ र समर्थन पाएका छौं,” उनले भने, “यसले ब्याडमिन्टन खेलप्रति पाँचथरमा गहिरो चासो र भरोसा बढेको देखाउँछ।”
प्रतियोगिता असार ५ देखि ७ गतेसम्म फिदिमस्थित जिल्ला समन्वय समिति पाँचथरको कवर्डहलमा आयोजना गरिएको थियो। जिल्लाका विभिन्न क्लब, स्वतन्त्र खेलाडी र खेलप्रेमीहरूको उल्लेखनीय सहभागिता रहेको प्रतियोगितामा प्रतिस्पर्धा मात्र नभई आपसी मेलमिलाप र खेलभावनाको सन्देश पनि प्रवाह भएको संघले जनाएको छ।
