काठमाडौं
जेन–जी आन्दोलनका क्रममा भागेका कैदीहरू अझै कारागार फर्केका छैनन्। करिब १५ हजारमध्ये पाँच हजार मात्र फिर्ता आएका छन् भने १० हजारजति सम्पर्कबाहिर छन्। यसले सामान्य नागरिकलाई असुरक्षित महसुस गराएको छ भने नेपालले अन्तर्राष्ट्रिय जगतबाट कालोसूचीमा पर्ने जोखिम पनि बढाएको छ।
संयुक्त अरब इमिरेट्स (युएई) ले नेपाली कामदारका लागि वर्किङ र भिजिट भिसा सोमबारदेखि बन्द गरेको छ। छिमेकी भारतले पनि सीमा क्षेत्रमा कडाइ बढाएको छ। कारागार व्यवस्था विभागका महानिर्देशक लीलाप्रसाद जोशीका अनुसार, कैदीहरू देशबाहिर जान नपाउन सबै विवरण अध्यागमन विभागलाई उपलब्ध गराइएको छ।
जोशीले बताएअनुसार, “भागेका कैदी फिर्ता नआए प्रहरीले पक्राउ गर्नेछ। आवश्यक परे कारागार ऐनअनुसार उनीहरूको कैद अवधि थप हुनेछ।”
जेन–जी आन्दोलनका क्रममा सरकारी र निजी सम्पत्तिमा भएको तोडफोड र जेल तोडफोडबाट कैदीहरू भागेका हुन्। कतिपय कैदी सीमा पार पुगेको अनुमान गरिएको छ। ललितपुरको नख्खु कारागारबाट पनि केही कैदी फरार भएका थिए।
भागेका कैदीमा हत्या, बलात्कार, मानव बेचबिखन जस्ता गम्भीर अपराधमा सजाय भोगिरहेका पनि छन्। सुरक्षा निकायहरूले कतिपय कारागारमा नियन्त्रण कायम गर्न गोली चलाउनुपर्ने अवस्था समेत आएको थियो।
सुरक्षा अधिकारीहरूले चेतावनी दिएका छन् कि कैदीहरू कारागार फर्किनु अत्यन्त जरुरी छ। उनीहरूले नफर्किए सामान्य नागरिक, न्यायपालिका, प्रहरी र पीडित पक्षका लागि जोखिम बढ्ने छ।
