पाँचथर । पाँचथरको जिल्ला सदरमुकाम फिदिममा गए राति भारी वर्षा भएकाे छ। मौसम विज्ञान विभागका अनुसार फिदिममा गएकाे २४ घन्टामा ५९.५ मिलिमिटर पानी परेको छ। ५०–१०० मिलिमिटर पानी पर्नुलाई भारी वर्षा मानिन्छ, त्यसअनुसार फिदिममा परेको वर्षा भारी वर्षा श्रेणीमा पर्छ।
जिल्ला प्रहरी कार्यालय पाँचथरले दिएकाे जानकारी अनुसार जिल्लामा कुनै क्षति भएको छैन। वर्षा जारी रहँदा पनि हालसम्म कुनै आकस्मिक घटना वा आपतस्थिति नदेखिएको प्रहरीका अधिकारीहरूले बताएका छन्।
मौसम विज्ञान विभागले वर्षालाई क्षेत्रगत आधारमा वर्गीकरण गरेको छ। सम्बन्धित प्रदेशमा १० प्रतिशतभन्दा कम क्षेत्रफलमा वर्षा हुने सम्भावना भएमा एक-दुई स्थानमा वर्षा, १०–३० प्रतिशतमा थोरै ठाउँमा वर्षा, ३०–५० प्रतिशतमा केही स्थानमा वर्षा, ५०–८० प्रतिशतमा धेरै ठाउँमा वर्षा, र ८० प्रतिशतभन्दा बढी क्षेत्रफलमा अधिकांश स्थानमा वर्षा हुने भनिएको छ।
जिल्ला प्रशासन र प्रहरीले सतर्कता अपनाउन सबैलाई अनुरोध गरेका छन्। नदी–खोल्सामा पानीको सतह बढ्ने सम्भावना भएकाले जोखिमपूर्ण क्षेत्रमा अनावश्यक गतिविधि नगर्न सचेत रहनु पर्ने बताइएको छ।
