सुनसरी
जेन–जी आन्दोलनका कारण सुरक्षा निकायको चौकीहरू विस्थापित भएको अवसरमा सीमावर्ती क्षेत्रमा लागुऔषध तस्करी बढ्दै गएको देखिएको छ। यसै क्रममा सशस्त्र प्रहरीले सुनसरी र मोरङ जिल्लामा ठूलो परिमाणमा गाँजा बरामद गरेको छ।
सशस्त्र प्रहरी बलको नियमित गस्ती टोलीले गएराति सुनसरीको इटहरी–५ स्थित स्यार्सेकाली पेट्रोल पम्प अगाडि पार्किङ गरिएको दुई ट्रकबाट करिब ५ हजार केजी गाँजा बरामद गरेको छ। बरामद गाँजा १ सय ५८ बोरामा प्याक गरिएको थियो।
वराह वाहिनी मुख्यालय पकलीका वरिष्ठ प्रहरी उपरीक्षक सुधीरजङ्ग थापाका अनुसार, ना ४ ख २९०१ नम्बरको ठूलो ट्रकबाट १ सय २४ बोरा र बा ५ ख ११६९ नम्बरको मिनी ट्रकबाट ३४ बोरा गाँजा बरामद गरिएको हो। तर, दुवै ट्रकका चालक फरार रहेका छन्। बरामद सामग्री थप अनुसन्धानका लागि आजै जिल्ला प्रहरी कार्यालय सुनसरीमा बुझाउने तयारी भएको उनले बताए।
यस्तै, गएराति नै मोरङको विराटनगर–१५ पेट्रोल पम्प नजिकैबाट प्रहरीले बोलेरो गाडीमा बन्दाकोभी लोड गरेर लुकाइछिपाइ गरिएको २ सय ६२ किलो गाँजा बरामद गरेको छ। यस घटनामा संलग्न तीन जना पक्राउ परेका छन् भने चालक भने फरार रहेको जिल्ला प्रहरी कार्यालय मोरङले जनाएको छ।
सुरक्षा निकायले हालैका दिनमा लागुऔषध तस्करी नियन्त्रणलाई प्राथमिकतामा राख्दै कडाइका साथ निगरानी गर्ने जनाएको छ।