फिदिम (पाँचथर)
भदौ २३ गतेदेखि सुरु भएको Gen-Z आन्दोलन दिनप्रतिदिन व्यापक बन्दै गएपछि पाँचथरमा सुरक्षा सतर्कता कडाइ गरिएको छ। आन्दोलनका क्रममा तोडफोड, आगजनी र सार्वजनिक सम्पत्तिमा क्षति पुर्‍याउने गतिविधि बढ्ने संकेत देखिएपछि संयुक्त सुरक्षा फौजले सर्वसाधारणलाई संयमता अपनाउन आग्रह गरेको हो।

शुक्रबार सार्वजनिक गरिएको अनुरोधपत्रमार्फत सुरक्षा फौजले आन्दोलित भीडसँग जानी–नजानी संलग्न भई अशान्त गतिविधिमा सहभागी नहुन चेतावनी दिएको छ। साथै, उद्योग, व्यवसाय, पसल तथा कार्यालय जस्ता आधारभूत सेवा प्रभावित हुने खालका कार्य नगर्न आग्रह गरिएको छ।

फौजले अफवाह, हल्ला र भ्रामक समाचार नफैलाउन पनि सचेत गराएको छ। “शान्ति, सुरक्षा र सामाजिक सद्भाव कायम राख्न सबै नागरिकले सुरक्षा निकायलाई सहयोग गर्नुपर्छ,” विज्ञप्तिमा उल्लेख छ।

यस्तै, आन्दोलन शान्तिपूर्ण ढंगले अघि बढाउनुपर्नेमा जोड दिँदै तोडफोड वा हिंसात्मक गतिविधिमा संलग्न हुनेलाई कानुन बमोजिम कारबाही गरिने चेतावनी दिइएको छ।

यसबीच पाँचथरमा प्रहरी, सशस्त्र प्रहरी र नेपाली सेनाको संयुक्त गस्ती तथा निगरानीलाई अझ कडा बनाइएको छ।