पाँचथर । ताप्लेजुङको भानुजन माध्यमिक विद्यालयको खेलमैदानमा भएको तेश्रो ताप्लेजुङ गोल्डकप उद्घाटन खेलमा इटहरीको द योङ ब्रदर्स क्लबले विजयी सुरुवात गरेको छ। घरेलु टोली ताप्लेजुङको तेल्लोक स्पोर्टिङ क्लबलाई २–१ गोल अन्तरले पराजित गर्दै द योङ ब्रदर्सले पहिलो जित हात पारेका हुन्।
खेलको २६ औं मिनेटमा तेल्लोकका सञ्जय श्रेष्ठले सुरुवाती गोल गर्दै घरेलु टिमलाई अग्रता दिलाएका थिए। तर दोस्रो हाफमा इटहरीका निरज खड्काले ७० औं मिनेटमा बराबरी गोल गरेपछि खेल थप रोचक बन्यो। त्यसपछि ७४ औं मिनेटमा युगन राईले निर्णायक गोल गर्दै इटहरीलाई जित दिलाए।
इटहरीका निरज खड्का खेलको प्लेयर अफ दि म्याच घोषित भएका छन्। प्रतियोगिताको अर्को खेलमा भोली साहारा क्लब पोखराले रेड स्टार क्लब झापासँग प्रतिस्पर्धा गर्नेछ।
लाखे जात्रा संचालन समितिले आयोजना गरेको प्रतियोगितामा विजेताले नगद ७ लाख २ हजार ८२ रुपैयाँ र ट्रफी पाउनेछन् भने उपविजेताले ३ लाख ५२ हजार ८२ रुपैयाँ र ट्रफी पाउनेछन्। साथै, सर्वोत्कृष्ट खेलाडीलाई मोटरसाइकल पुरस्कार दिइने आयोजकले जनाएको छ।
