पाँचथर । पाँचथरमा पारिवारिक झगडा ज्यान लिने घटनामा परिणत भएको छ। फालेलुङ गाउँपालिका–७ आहाले घर भई हाल फिदिम नगरपालिका–१ नाम्दुस्थित ससुरालीमा आएका २७ वर्षीय महेन्द्र तामाङले आफ्नै श्रीमती २२ वर्षीया अनु राईको कोदालोको पासो प्रहार गरी हत्या गरेका छन्।
प्रहरीका अनुसार घटना बिहिबार राति करिब १० बजे भएको हो। घरायसी विवादका क्रममा तामाङले कोदालोको पासोले अनु राईको टाउकोमा प्रहार गरेका थिए। गम्भीर घाइते भएकी राईलाई तत्काल जिल्ला अस्पताल पाँचथरमा प्राथमिक उपचारपछि झापाको बीएण्डसी अस्पताल बिर्तामोडमा लगिएको थियो। तर उपचारकै क्रममा आज बिहान ४:२० बजे चिकित्सकले उनलाई मृत घोषणा गरेका छन्।
मृतकको शव हाल बीएण्डसी अस्पतालमै राखिएको छ भने हत्यामा संलग्न महेन्द्र तामाङ घटना लगत्तै फरार भएका छन्। जिल्ला प्रहरी कार्यालय पाँचथरले उनको खोजीका लागि प्रहरी टोली परिचालन गरिएको जनाएको छ।
स्थानीयवासी र आफन्तजनले घटनाप्रति स्तब्धता व्यक्त गरेका छन्।
