पाँचथर । फिदिममा पछिल्ला २४ घन्टामा ४६.५ मिलिमिटर पानी परेको छ। मौसम पूर्वानुमान महाशाखाले दिएको जानकारी अनुसार यो मात्राको वर्षा मध्यम श्रेणीमा पर्ने बताइएको छ।
मौसमविद्का अनुसार २४ घण्टाभित्र १० मिलिमिटरभन्दा कम पानी पर्नु हल्का वर्षा, १० देखि ५० मिलिमिटरसम्म पानी पर्नु मध्यम वर्षा, ५० देखि माथि १०० मिलिमिटरसम्म पानी पर्नु भारी वर्षा, १०० देखि माथि २०० मिलिमिटरसम्म पानी पर्नु धेरै भारी वर्षा र २०० मिलिमिटरभन्दा माथि पानी पर्नु अति भारी वर्षा हो।
यस्तै एक-दुई स्थानमा वर्षा भन्नाले सम्बन्धित प्रदेशका जुनसुकै ठाउँमा १० प्रतिशतभन्दा कम क्षेत्रफलमा पानी पर्ने सम्भावना देखिनु हो।
यदि १० प्रतिशतदेखि ३० प्रतिशतसम्मको क्षेत्रफलमा पानी पर्ने सम्भावना छ भने थोरै ठाउँमा पानी पर्न सक्छ भनिन्छ।
त्यसैगरी ३० प्रतिशतदेखि ५० प्रतिशतसम्मको क्षेत्रफलमा पानी पर्ने सम्भावना छ भने केही स्थानमा पानी पर्न सक्छ भनिन्छ।
त्यस्तै ५० प्रतिशतदेखि ८० प्रतिशतसम्मको क्षेत्रफलमा पानी पर्ने सम्भावना छ भने धेरै ठाउँमा वर्षा हुन सक्छ भनिन्छ।
यदि ८० प्रतिशतभन्दा बढी क्षेत्रफलमा पानी पर्ने सम्भावना भयो भने अधिकांश स्थानमा वर्षा हुन सक्छ भनिन्छ।
यता, लगातारको वर्षाले कतिपय स्थानमा सानाे पहिरोको जोखिमसमेत देखिन थालेको छ। स्थानीय प्रशासनले सतर्कता अपनाउन आग्रह गरेको छ।
महाशाखाका अनुसार देशका पूर्वी भूभागमा अझै केही दिनसम्म मौसम बदली रहने र वर्षाको सम्भावना कायमै रहेको छ।
वर्षासँगै खोला तथा नदीहरूको सतहमा पनि वृद्धि हुन सक्ने भएकाले नजिकै बस्ने बासिन्दालाई विशेष सावधानी अपनाउन विज्ञहरूले सुझाव दिएका छन्।
